وصل عاشورك

وصل عاشورك و روحي عله مصابك غدت جمرة خدمتي و وقفتي اببابك فضل من امك الزهره اعيش ابخير و ابنعمـه الحمدلله عله الخدمه ___. وصل عاشورك و ناري ابدليلي و الدمع جاري اشمّن حرمل المجلس و اخدّر چایك ابناري مثل مـا حزنـت روحي احـزّن ديـرتي و داري امر من موكب الموكب و اشد للمجلس اوزاري اشـد اوزاري ابهـمّــه الحمدلله عله الخدمه _____ وصل عاشورك و روحي تحن لایامك و تنعه شكو مجلس عله مصابك یجر دلالي و ایقطعه ويه ربعي ننصب الخيمه و نهيئ مجلس الدمعه و بين العتبه و المنبر ادوّر امك البضعه تون للمنسحق جسمه الحمدلله على الخدمه _____ السئلني و قلي شتداوم اداوم قتله بالموكب مثل تچلوبـة الغـرقان اضل بالمنبـر امچلب نطیتك چلمه من زغري و اوافیه الك واجب اذا عفت المجالس هاي ازیّن بیدي هالشارب بخدمتـك اوصل القمّه الحمد لله علی الخدمه ______ طعم زادك طعم چایك طعم قعدات خدامك طعم لیل الحسینیه و محـنّـة هـاي ايامـك مطر خيرك يبللنه و خدم هاي احنه كدامك فضل منك تخلينــه نطب خيمه من اخيامك احـب فيّـك يبواليمــه الحمدلله عله الخدمه _____ ابحياتي و دنيتي كلها اللطم صاير الي واهس الكراسي غرت الوادم و انه ابفي منبرك جالس امد ايدي الك و ابچي و يصيح ابضامري هاجس انه الما صير الك عابس اريد اشويه من عابس مثلهه ما تصـح رحمـه الحمدلله علي الخدمه ____ الف رحمه اعله روح امي رغم ضیم الدهر والبین خذتني لامــك الزهره و تحاچيها بدموع العين جبت ابني و اریدنـچ تسجلینـه عبد لحسین طفل بس من صرت خادم كبر عمري الك ضعفین انه ابزغري و صرت زلمه الحمدلله علــه الخدمـه ____ عشت عمري عله احسابك شریدن انت تنطیني اذا ما امد الك ایدی امدّن المن ایدیني ؟ اذا ما اسمك ابدمي ارد و اقطع شراییني بحیاتی و دنیتی غيــرك فلا واحـد ترس عیني الیخدمك یرتفع اسمه الحمدلله عله الخدمه ___ تمت والحمد لله للشاعر حسين الساعي