أهلا بكل اللغات

أهــلاً بـكــل اللغــات نگـولهـا تسمع الدنيا بعرضها و طولها أهــلاً بــيـكـم فــي كـــربــلاء الخير دربه ، الدين حبه ماكو أحلى من هذا الدرب جنة بخطوتين روح امشي ، عوف كلشي هذا الحبيب ابن الحبيب ابو علي حسين للكــاع خطـوتكـم نبـض بـالمـاي بالجــو بـالارض بالطول صحنه و العرض - هله و الف هله - يا خير عالكاع انتشر زوار انـتــم لــو مطر والله حيــرتو البـشر - عجيبـة كربلـه - الكرم عدنه يختلف عن غيرنه إحنـه حتى الطير ياكل خيرنه والطـيـر زايــر فــي كـــربــلاء راح كل هم ، خير مقدم يالجيتك مثل الهوا من ما تجي نموت هاذ موكب ، بيه معزب يحچي وي الاخرس بالاشارة تفضل وفوت للعين خطواتك كحل والضيف لا ما ينسئل يـا ديـن يتبع يا أصل - صرنه إله أهل - يحسين مو بس شيعتك زوار كــلـها لـ حضـرتــك مــن غيـر دولــة تعـنـتك - يا سيد الدول - حسين إسمه بكل وطن تلگونه والعـراق انخلق لجـل عـيـونــه بـــاب الجــنــة فــي كـــربــلاء حسين رفعة ، مو بدعة الشاعر: مصطفى العيساوي